TRAVESÍA CORDILLERA CANTÁBRICA -2ª ETAPA-

Continuó la escursión pola cordillera y continúa la mio narración de esta actividá que entamamos a mediaos de enero y dexamos sin acabar, esperando que pasare un temporal de viento y ñebe que duró quince dis.

Por fin el sábado 7 de febreru se retomó la aventura onde se dexó, en La Cueta onde mos desplazamos dos vehículos. Javier, Félix y Tito con intención de continuar hasta Tarna polo menos, Hector, Javi y el que escribe pa acompañalos pola mañana. Yo tenía una cita perimportante el domingo y de llunes ya me xuniría, suponía que nel refugiu el Meicín o nel altu la Cubilla, según fuera la marcha de los compañeros.

En la Cueta el grupu tomó el camín del Lago del Valle. En realidá no teníamos claro si dir pol sur de Peña Orniz (seguramente el camín mas cortu) o bien polo llagos de Somiedo. Al final fue algo mas bien azaroso, pero parez ser que el camín pol llau asturianu diose bien y el trio llegó a dormir a Torrebarrio.

Esperaba la llamada al oscurecer del domingo, pa saber a onde iría a encontralos. No llegó la llamada de Félix sino hasta las 11 la noche: ¿onde andais ho? Tamos en Busdongo, acabamos llegar, mañana no madrugues mucho que tamos rotos… En un día se paparon dos etapes (cortes eso sí) mas el trayectu de la estación invernal a Busdongo. Al final escribo algo sobre les dos etapes que me falten por acabar.

Del “Maragato” onde tomamos tos el café, retrocedimos, empleando un un par de viajes de furgoneta, hasta el alto de Payares, pa poder subir el Cellón pola divisoria. Hasta esa cima tuvimos la compañía de mio pa (que se estrenaba en montaña invernal) y de Nico el de la Pola, colos neños. Buen día de sol y el pensamiento en que taríen recientes les güelles de la travesía entamada pola federación de montaña, de Payares a San Isidro (bueno, a Fuentes d´Inviernu). Olvidábaseme decir que esta travesía yo quería facela con los esquís normales, pa mayor seguridá, pero al dir a probalos el sábado aparecio-yos una avería, así que tuve que volver a usar el mio equipo de telemark, algo precariu pa la dificultá de la ruta. Por otru lao, toes les mochiles habíen adelgazao unos cuantos quilos. Estrenaba mochila de 45 litros ¡menudu cambiu!.

La etapa del Cellón a Piedrafita no tuvo novedá. Pa mi fue nuevo entre el Cellón y el Collau Propinde (el de la Carisa). Desde el Tres Conceyos al Bolero tengolo bien “trabayao” cola bici. El únicu incidente (que no llegó a susto) fue que tuve que quitar los esquies por querer torcer baxando el Cellón pola parte norteada antes de tiempu. El sol tovía no pega na parte nortiá, asina que abrá que andar con güeyu de aquí pa-arriba. Lo bueno ye que onde ta la ñebe duro pues ta duro pero no vimos xelu nunca. Fiximos una parada llarga nel collau Propinde, al sol. A Javier presta-i hidratase a base de sopes calientes y de te. No hicimos cumbre ni en el Tres Conceyos ni nel Robequeras (y menos nel Estorbín) pero si nel Bolero. De esti a Piedrafita muy bien, sin quitar los esquís, llegamos a les cabañes del Mesón, que son dos: una cerrada y la otra llena ñebe. Facía una noche perguapa así que estiramos les esterilles enfrente la cabaña grande (la piesyá), que llera onde estaba seco. Víase una estrellada de escándalu. ¡por fin un “vicac”!

Pola mañana onde mos habíemos echao taba encharcao: la temperatura llera de 2º sobre cero y col calor corporal habíemos fundío el xelu de la tierra. Lo bueno que facía sol y mientres desayunábamos seco todo. Decidimos remontar el alto (eso sí, no pola pista que ye casi llana sino por onde meyor víamos. La colectiva del fin de semana esbiyaría baxar algo mas pa evitar el Picu la Llaguna (1963).

Detengome un poco en esti picu, al que llegamos pola parte Norte, ya que ye un pasu malu y pue ser de interés. Hubo reunión antes de decidir si facer cumbre y pasar pola parte Sur o bien baxar dirección Este pa rodear la “Peña la Llaguna” (1942, son dos cimes diferentes). Javier tomó l´iniciativa y fixo cumbre en un plis. La pala sur tien 500 metros de desnivel y 30º de inclinación. En fin, pasamos con mas mieu que peligru (muy buena ñebe, sin necesidá de facer giros), pero ye un pasu a evitar con peor ñebe. O bien se rodea pol norte (si no ta xelao) o bien no se fai esti picu y se va pola vaguada Bucipeñas al collao Morgao.

Tampoco a partir de ahí aduvimos muy acertaos pa llegar al Picu Llanonas (tuvimos que cambiar el criteriu y acabar subiendo tras facer algo media ladera. Parada llarga pa facer sopa nel siguiente collau y continuamos dirección la Fitona. Aquí llegó pa mi el sustu de la Travesía. Supongo que en una travesía de esti tipu, lo normal ye llevar polo menos un sustu, o mancase o pasar miseria, o frío... Una llomba con inclinación cambiante (pero nunca muy alta), una ñebe con demasiau sol, una pequeña arista y la ñebe ya no tenía por mí. Al tercer quite aquello por fin quiso parar. Ye curioso, soy un esquiador de tener varies caídes por día, n´esta ocasión el golpe de adrenalina fixome manteneme sobre los esquís. En fin, sin duda el tramu mas salvaxe de la ruta. La Puerta de Faro la baxamos pola güella sin falta poner los crampones (eso sí ¡sin esquis!) hasta pasar lo mas pindio. Buena esquiada tovía hasta Vegarada, y llueu por carretera hasta la estacion de San Isidro.

El Miércoles madrugamos pa dir a desayunar a La Ralla, con tiempu de sobra pa llegar a Tarna. Abrimos les pistes de Fuentes, que sin embargo no taben muy dures ¡que díes mas buenos! Saludamos a Avelino, que-i dexó un par de esquis guapísimos a Javi (Dynastar Yeti con fijaciones Silveretta) pa reemplazar el equipo digamos algo gastau que usa Arienza. Los primeros km colos esquies nuevos llera imposible agarrarlu ¡sedríen los esquies muy buenos o los otros muy malos! Etapa fácil pero, en fin, ya sabéis como ye esto. Subiendo el Remelende la marcha del grupo empieza a acelerar, alternando les posiciones de cabeza. En los últimos kilómetros Tito y Félix tomen ventaja y reparo en que, tras cinco días de esfuerzu fuerte, son dos deportistas fortísimos. Baxando ocurrió la lesion de Tito, n´ unos de los montes que habrá subío con esquies mas veces. Menuda broma. Deseote una rápida y buena recuperación.

En fin, na cena allí en Tarna dexaron-se clares les posiciones. Tito y Félix (independientemente de la lesión) debíen volver. Javi quería seguir porsi acasu les condiciones cambiaben y no podía llegar a San Glorio. Pola mi parte, ni taba cansau ni se me facía llargo, pero tenía que optar y prefería acabar la travesía unos díes mas tarde.

Regresamos tos nel 205 de Pablo. El dia siguiente, jueves, subi pol material a Tarna. Javi ya había salio en solitario varies hores antes de llegar yo, llegaría el sábado a mediudía al Coriscao pa baxar a San Glorio y finalizar el su retu. Yo aproveché el día esquiando en San Isidro. El domingo, dia de la Alta Ruta Texu, llera el 8º día consecutivu pa Javi, lo que no fue torga pa que (ligeru de pesu) estirara el grupu de 40 y picu esquiadores.

Pero esti invierno únicu pola cantidá de ñebe también ta teniendo unes bocanes perllargues de buen tiempu, asi que la oportunidá pa retomar la ruta presentose una selmana mas tarde.

De viernes, sin prisa ninguna, el tercetu inicial, con Javi como guía, salimos de Tarna. Etapa super-relaxá pa dir a dormir antes del Pozúa. Al día siguiente espera una xorná bastante grande, que entamamos temprano con subida en ¾ de hora, pa baxar ¿esquiando? pol bosque de la cara norte al Pontón, tovía con buena ñebe. Tramín de carretera pa entamar dir garrando altura pal Gildar. Buen día, con viento, y al acabar de subir esti monte sufro un problema respiratotiu por culpa haber quedao con poca ropa, y moyá de sudor. Como un ataque de asma (no soy asmáticu pero en primavera n´estos casos sí me pasa), asústome bastante pensando que tovía queden polo menos cinco hores. Los mios compañeros me tranquilicen: ye casi todo pa baxo home. Aún así, en la pala anterior al Gabanceda la ñebe ta muy asoleyada y sufrimos un par de aludes de fusión, bastante superficales. Aquí ocurriome algo curioso, a pesar de andar físicamente muy mal (abrigau a tope y con un sobre de no-se-que pal resfriao, mas o menos podía respirar) pues entamé a atopame cómodu na ñebe, como sabiendo onde taba seguro y onde no.

En fin, noche otra vez en cabaña, y al día siguiente atópome meyor de lo que taba el día anterior, antes que me diera el “ataque”. La subida al Curiscao faigola perbién (la mochila no pesa ya casi, respiro a plenu pulmón). Al llegar arriba lo único que me apetez ye esquiar, ya que fai otru día super-guapu y al coincidir cola colectiva del Texu sigo esquiando un par de hores mas.

La verdá que no sentí que llegara a ninguna meta. Puede ser el no llegar a San Glorio (a media bajada atopé la colectiva y dí la vuelta pal Coriscao otra vez), pue ser que me falten les dos xornaes de La Cueta a Payares o también pue ser que no me tomé como retu la travesía, sino mas bien cada día, cada ascensión y cada descenso en sí, una oportunidá pa facer munches.

Ta claro que ye una actividá que da pa comentala, y que sin acabala no se pue decir “yo fixe…” ¿tien sentíu pa mi dir facer el tramu que me falta agora? ¿y que pasa col tramu San Glorio-Alto Campoo? La respuesta a la segunda ye clara: voy si van los mis compañeros. Pa la primera, no hay solución. Supongo que iré si hay con quien ir y si les condiciones son muy buenes, diré pero pescancio que la travesía ya pasó por ahí, y volver sedría pone-i un remiendu. Nota: al final no fuí, solo un día a facer una circular por Peña Orniz.

Otra cuestión espinosa ye el materal que usé, el famosu equipo de telemark. Ni se me había ocurrido acabar la travesía con esi equipo. Ya dixe que en el tramu central (Piedrafita-Vegarada) no lu quise usar si no fuera por una avería en la “Diamir”, pero ahora ¿tien un méritu especial facer la travesia “con esquí de telemark”? ¿supon eso que me aprovecho de una iniciativa que no ye la mía pa “adelantame” a los mis compañeros o bien apurre eso méritu a la actividá colectiva? ¿existió la “épica” o la “aventura” en la ruta? ¿fue eso en algún momento concretu o fue el global de la misma?

En fin, muches preguntes y muy poques respuestes. Veo nel “Desnivel” la ruta de Borja y Gaizka. En 6 díes consecutivos ficieron una ruta casi tan llarga como la nuestra -llevo-i 4+8 días en el casu de Javier y 4+5+3 días pa Félix-. Incluso la mi actividá (4+3+3) o la de Tito (etapa central de 5 días) me parez comparable a la gesta de la pareja vasca. Dado que sale en portada y que ye uno de los reportaxes grandes de la revista, aparentemente, la su ruta sí fue “épica” o “meritoria” y pregúntome si la nuestra lo habrá sido y si el méritu de Borja y Gaizca habrá tao en la ruta en sí, en lo rápido que la ficieron o en no haber parao ni un día entre medies.

Definitivamente, creo que la travesía del Texu tuvo un méritu muy comparable, ya que opino que la falta de preparación física específica, el estilo auto-suficiente, el prescindir del usu del Gps y hasta de cartografía, así como la mayor dificultá de la ruta que esbillamos, apurre unos “handicaps” a la actividá.

Tampoco m´apetez facer lliteratura cola travesía. De cara a quienes pueda interesar repetir la actividá, apurrir tos los datos necesarios, track, semeyes etc, y pa un pues aprender de esta actividá nueva pa mi, que toi seguru que me influirá nel estilu d´enfotos nel futuru.

Pero pa eso trataré d´esplicalo en entraes del blog futuros, aquí na mas que dar les gracies tanto a los compañeros de ruta como a familiares ya collacios pola sofita: munches gracies.