Ye un puxu nes coraes, al averase´l
solsticiu inviernu, el que sienten tos los Ulises piquiñinos del mundu: los que
puen -y tienen aeropuerto- regresen unos díes por aquello de non escaecer, tou
d´afechu, eso de “la identidá”.
Esti ye un Ulises asturianu, de
profesión, executivu, pero de afición, arqueólogu. Vieno por una selmana na
mas. Y esti ye´l so viaxe, un día que non llovió, pola arqueolxía asturiana,
que entamó, como to lo bueno, de casualidá, camín d´Uvieu, que se pasó de
llargu de la entrá pa Parque Jurásico Principado, al despistase al dase cuenta
que al llau Catedral, había
un bichu blancu coles costielles a l´aire. ¿Qué ye? ¿un centollu? ¿una nave
espacial? ¡non! Ye: EL CALATRAVA.
Decidió entós Ulisín (que asina lu llamaben
en casa), aparcar el scooter flotante ena zona azul, y allegase al mediu Uvieu.
Dempués dar dellos dolcos enreor l´edificiu, cavilando el significau que
tendría, entrugoi a la del puestu les “chuches” que, como siempre, ye la que lo
sabe todo. “Non fiu, ser… esto ser ye´l pallaciu congresos, pero fai cuantayá
que ta na mas que de grandes almacenes. Eso sí, pa Nochevieya, ta entamao cena
y cotillón, con barra llibre, por solo 70 euros. ¡Va armase la de coller!”
Anotó Ulisín toes estes coses y subió a
reflexionar a Los Monumentos. Sentau nun poyón en frente Santa María el
Naranco, Ulisín, que tien muncha imaxinación, percibió daqué nos tres arcos del
pallaciu ramiriense, y foi entós cuando decidó colar pa Cangues d´Onís, a
visitar, la capiella la Santa Cruz, y esto ye lo que, conduciento el scooter,
foi imaxiando del Rey Pelayu.
Dempués de lo de Cuadonga, Pelayo quedose a vivir en Cangues,
que-i gustó mucho, sobre to, pol rio. Llera Pelayo un paisanu prudente y amigu
de la llectura. En so casa, colos fios y la muyer, falábase igual Godo que
Protobable (la llingua d´aquellos tiempos), pero tos podíen tamién falar
correutamente la llingua l´imperiu, el llatín, pa colos extranxeros, y, aunque
solo fuere pa entendese, lo básico, tamién comprendíen el musulmán.
Poles feches del solsticiu, como tola demás xente, facíase en casa
Pelayo una buena cena, y, como yos gustaba a tos la sidre, el discurso facíase
enantes de cenar.
Añu tres añu, los mismos temes, que si había de casar el fiu cola
heredera los cántabros, que si empecipiar un reinu cristian…, y Pelayo, que
siempre dixo que a él, cola guerta y dir a pescar, ya y prestaba, y que los sos
fiyos, si queríen facer negociu, lo que teníen que facer yera poner un llagar,
que si non víen les manzanes tan buenes que había na pomarada, y que llera mas
tranquilo, y con mas futuru, el negociu sidreru que la política. Dixo:
“Fiyos, facer, podéis facer lo que queráis, yo, solo vos digo,
sobre to a ti Favila, que tangais cuidao colos osos si vais cazar, y colos
madrileños si vais polo de la política”. Dicho esto, apuró el culín de sidre y,
naturalmente, del restu lo que dixo ye lo de “que amigos somos” y ”préstame que
teas aquí, manolín”…en fin, la exaltación de l´amistá.
Per ehí diba la imaxinación d´Ulisín al
aparcar en Cangues, xusto ena cai que va pa la capiella, onde siempre se atopa
bien p´aparcar. Nel paseu ente onde dexó el scooter termomagnéticu, y la capiella,
acordose la primera vegada que, ena escursion del colexu, yos explicó la
mayestra que la capiella la Santa Cruz non llera el palaciu Pelayo, sino una
reconstrucción, pero que lo interesante, aunque no se pudiera visitar, taba
dentro la capiella, onde se documentaba l´iniciu del reino astur, en armonía coles
costumbres tradicionales.
D´eso, precisamente, llera de lo que faló un día Pelayo con
Gaudiosa, la so muyer, mientes trabayaben ena güerta. Dixo-i ella: “Pelayo,
¿non sedría meyor dexar un pocu documentao lo de Cuadonga? Colos poemes
perguapos que me talles col escoplu, bien podíes grabar cualquier cosa, ya
sabes que estes coses traen siempre controversia, como lo de la tu hermana”
Así diba la imaxinación d´Ulisín, que, aficionau a l´arqueoloxía, tamién
sabía apreciar la lliteratura historiográfica, que, na su opinión, llera en si
un xéneru lliterariu del que-i prestaba, por encima de todo, la encuadernación.
De regresu a casa, onde-i esperaba la cena el solsticiu, diba cavilando Ulisín
en porqué non habría escrito, como el Rey Pelayo, tampoco nada Frasinelli, él, que
meyor que naide conoció l´arqueoloxía asturiana, la historia de la
historiografía y viceversa, y fue tol camín pensando en como seríen les conversaciones
del gran xeniu alemán y Ramona, la so muyer, sobre si serdría meyor dexar escrito
to lo que´l sabía de la xente asturiano, y de toes les aventures que ente los dos s´imaxinaben.